తారాకాంతి తిరస్కారి నాసాభరణ భాసురా ॥ 7 ॥
19. నవచంపకపుష్పాభనాసాదండవిరాజితా
నవ చంపకపుష్పం అంటే అప్పుడే నూతనంగా వికసించిన సంపెంగపువ్వు.
అమ్మవారి నాసాదండాన్ని, అంటే ముక్కు దూలాన్ని ఈ పుష్పంతో పోలుస్తున్నారు.
అమ్మవారి నాసా దండం ఈ కొత్తగా విరిసిన సంపెంగలాగా విరాజిల్లుతున్నది అని భావం.
అమ్మవారు పుష్పాలకే సుగంధాన్ని ఇచ్చే తల్లి కదా.
అందునా సంపెంగలు ఎక్కడో విరిసినా, ఆ ప్రాంతం అంతటా సుగంధాలు విరజల్లుతాయి.
పైగా అప్పుడే విరబూసిన సంపెంగలు మృదువుగా, సున్నితంగా,
కుసుమ కోమలం అన్న పదానికి అసలు సిసలైన అర్థంలా ఉంటాయి.
సంపెంగకి ఇంకో లక్షణం కూడా వుంది. అవి మొత్తం విచ్చుకోవు, మొగ్గగానూ వుండవు.
విచ్చీ విచ్చుకోని ఆ సంపెంగ, అమ్మవారి ముక్కు వలే ఉన్నదట.
ఆ సంపెంగకు ఆ సుగంధాలు అమ్మవారి ముక్కు నుంచే సంప్రాప్తించాయి.
వాసనలు చూసే ముక్కు, పువ్వుకే ఆ వాసనలని ఇచ్చింది.
మన వాసనలన్నీ మనల్ని అమ్మవారి ముక్కు దగ్గరకే చేరుస్తాయి,
ఎందుకంటే, ఆ వాసనల మూటను మనతో అనుసంధానించింది ఆ అమ్మే.
వాసనలంటే, ఎన్నెన్ని జన్మల నుంచో మనలో స్థిరపడిపోయిన
మన ఆలోచనలు, కోరికలు, అనుభవాలు, అనుభూతులు, మన స్వభావం మొదలైనవి.
మనకు ఆ సంచిత వాసనలను ఇస్తూనే, మళ్ళీ ఆ యా వాసనల నుంచి
మనలను విముక్తులను చేసేదీ ఆ జగన్మాతే.
నవ చంపక పుష్పపు నాసాదండంతో విరాజిల్లుతున్న,
ఆ నవచంపకపుష్పాభనాసాదండవిరాజిత కు వందనం.
ఓం శ్రీ నవచంపకపుష్పాభనాసాదండవిరాజితాయై నమః
20. తారాకాంతితిరస్కారినాసాభరణభాసురా
అమ్మవారి నాసాభరణము, అంటే ముక్కుబులాకీ, ముక్కుపుడకలు తారల కాంతినే
ధిక్కరించేంత ప్రకాశంతో ధగధగ మెరుస్తున్నాయి.
ఇక్కడ నాసాభరణాలకు అమర్చిన ఆ రవ్వలకాంతులు
అమ్మవారి ముఖదీప్తిని మరింత భాసమానంగా మనకు చూపిస్తున్నాయి.
తారలు అంటే ఆకాశంలో మెరిసే నక్షత్రాలు, గ్రహాలు.
ఆ తారకలు ఎంతో ప్రకాశంగా తమ సహజ కాంతితో వెలిగిపోతున్నా కూడా
వాటి కాంతి అమ్మవారి ముక్కుపుడక ముందు వెలాతెలా పోతున్నాయి.
మరి వాటికి ఆ కాంతిని ఇచ్చింది కూడా సంపూర్ణ కాంతితో వెలుగొందుతున్న అమ్మే కదా.
ఆ తారల కాంతి ప్రభావాన్ని మించిన కాంతితో జ్వాజ్వల్యమానంగా ప్రకాశిస్తున్న
అమ్మవారి నాసాభరణాన్ని దర్శనం చేస్తే, ఆ నక్షత్ర, గ్రహ దోషాలు పోయి
తుల లేని అమ్మ ఆశీర్వచనం, అండ లభిస్తాయి.
కనుక అమ్మవారి ముక్కుపుడకని కానీ, బులాకీని కానీ భక్తి, శ్రద్ధలతో
దర్శించినవారి అన్ని నక్షత్ర, గ్రహ దోషాలనీ అమ్మ పరిహారం చేస్తుంది.
ఎందుకంటే, ఆ నక్షత్రాలు, గ్రహాల ప్రకాశ ప్రభావాల కన్నా
అమ్మ నాసాభరణ ప్రకాశ ప్రభావాలు ఎన్నో రెట్లు ఎక్కువ.
తారల కాంతిని తిరస్కరించేంత ప్రకాశం కల ముక్కెరలను ధరించి,
మనలను కష్టాల నుంచి గట్టెక్కించే ఆ తారాకాంతితిరస్కారినాసాభరణభాసుర కు వందనం.
ఓం శ్రీ తారాకాంతితిరస్కారినాసాభరణభాసురాయై నమః
------------భట్టిప్రోలు విజయలక్ష్మి
9885010650
Beautiful visleshana Vijaya.
రిప్లయితొలగించండిEntha adbutanga explain chestunaru aunty.. chala bagundi ....
రిప్లయితొలగించండి