8. కదంబమంజరీక్లుప్తకర్ణపూరమనోహరా తాటంకయుగళీభూతతపనోడుపమండలా

కదంబమంజరీక్లుప్తకర్ణపూరమనోహరా

తాటంకయుగళీభూతతపనోడుపమండలా ॥ 8 ॥

21. కదంబమంజరీక్లుప్తకర్ణపూరమనోహరా

మంజరి అంటే పూల చెండు. అందునా ఆ పూలు కదంబపుష్పాలు. 

కదంబాలు సౌగంధికాలు, చుట్టూ పరాగాలతో బంతుల్లా చూడ చక్కగా ఉంటాయి. 

అమ్మవారు చక్కగా ఒక చిన్న కదంబ పూల చెండు చెవి నిండా మనోహరంగా 

అలంకరించుకుంది. ఆ సుగంధము అంతటా ఆవరించుకుంది. 

సాధారణంగా పూలచెండు తలలో తురుముకుంటాం. కానీ అమ్మవారు చెవికి పెట్టింది. 

ఆ సుగంధానికి పక్కనే ఉన్న కామేశ్వరుడు పరవశించాడు.  

కామేశ్వరి కూడా తాను సృష్టించిన ఆ సుగంధ ప్రవాహంలో 

తాను కూడా కామేశ్వరునితో కలసి ఆనందిస్తూ వున్నది. 

సనాతన ధర్మాన్ని తక్కువ చేసి మాట్లాడితే కానీ మనుగడ లేని వాళ్ళు, 

చెవిలో పువ్వుని వెటకారంగా చేసి మాట్లాడుతారు. 

దేవుని పాదాల నుంచి వచ్చిన పుష్పాలను శిరసున కానీ, చెవిపై కానీ ధరించటం మన పద్ధతి. 

సహస్రారంలో  కొలువైన అమ్మను సూచిస్తూ  సిద్ధులు, యోగులు, 

సన్న్యాసులు పుష్పాలని శిరసుపై ధరిస్తారు. కంచి పరమాచార్యులు పూలమాలలు,  

తులసీమాలలు ఇస్తే, శిరసు మీదే పెట్టుకునేవారు. 

సామాన్యులు చెవిపై కానీ, ముచ్చిలిగుంటపై కానీ ధరిస్తారు. ఇది మన ఆచారం. 

ముచ్చిలిగుంట కన్నా చెవే  ముక్కుకు దగ్గరగా ఉంటుంది. 

వాసనలను సునాయాసంగా ముక్కుకు చేరవేస్తుంది. 

అమ్మవారు చెవి, ముక్కుకు గల సంబంధాన్ని మనకు ప్రబోధిస్తూ తనకెంతో ఇష్టమైన, 

ఒక చిన్న కదంబ మంజరిని  చెవిపై ధరించింది. 

చెవి చుట్టూ ఒక చిన్న కదంబ పుష్పమాలను ధరించి మనోహరంగా వెలిగిపోతున్న, 

ఆ కదంబమంజరీక్లుప్తకర్ణపూరమనోహర కు వందనం. 

ఓం శ్రీ కదంబమంజరీ క్లుప్తకర్ణపూరమనోహరాయై నమః 

22. తాటంకయుగళీభూతతపనోడుపమండలా

అమ్మవారు అద్భుతమైన, మహా ప్రకాశవంతమైన తాటంక యుగళాలను ధరించి వుంది. 

తాటంకాలంటే చెవికమ్మలు. అవి మామూలుగా వెలిగిపోయే వజ్రాలవో మాణిక్యాలవో కావు.

అవి తపనోడుప మండలాలు. తపనుడు అంటే సూర్యుడు. ఉడుప అంటే చంద్రుడు. 

సూర్యచంద్రులు దివారాత్రాలను తమ వెలుగుతో నింపి మనకు వేడిని, చల్లదనాన్ని 

ఇవ్వటమే కాకుండా, మనకు ప్రాణాధారమైన అన్నాన్ని, నీటినీ, వెలుగునీ, 

ఇంకా ఎన్నింటినో ఇస్తున్న మహా గ్రహమండలాలు.  

అటువంటి మహా గ్రహ మండలాలను తన చెవి కమ్మల జతగా ధరించి వుంది అమ్మవారు.

ఆ సూర్య చంద్రులిద్దరూ అమ్మ ఆజ్ఞానుబద్ధులై, ఎవరికి ఎక్కడ ఎప్పుడు ఏమి ఎలా 

ఇవ్వాలో ఇస్తూ, అమ్మ చెవికి వేలాడుతూ మహా ప్రకాశవంతంగా వున్నారు. 

అటూ ఇటూ సూర్యచంద్రులు, మధ్యలో ఈ రెండు గ్రహమండలాల కన్నా 

అత్యంత ప్రకాశవంతంగా వెలిగిపోతున్న, ఆ జగదంబను మనసులో దర్శిస్తే జన్మకు ధన్యత. 

సూర్యచంద్రులనే తన తాటంకాలుగా ధరించి, మనలను తన కరుణా సముద్రంలో 

ముంచివేసిన, ఆ తాటంకయుగళీభూతతపనోడుపమండల కు వందనం.  

ఓం శ్రీ తాటంకయుగళీభూతతపనోడుపమండలాయై నమః 

------------భట్టిప్రోలు విజయలక్ష్మి

9885010650