13. కనకాంగద కేయూర కమనీయ భుజాన్వితా రత్నగ్రైవేయ చింతాక లోలముక్తా ఫలాన్వితా

కనకాంగద కేయూర కమనీయ భుజాన్వితా 

రత్నగ్రైవేయ చింతాక లోలముక్తా ఫలాన్వితా ॥ 13 ॥

31. కనకాంగదకేయూరకమనీయభుజాన్వితాయై

ఇప్పటివరకు  ఆ శ్రీ మాత కురుల నుంచి చుబుకం దాకా దర్శించుకున్నాం. 

ఇప్పుడు అమ్మ ఆభరణాలను మనసారా దర్శిద్దాం. 

కేయూరము, అంగదము అనే బంగారపు భుజకీర్తులు అమ్మవారి భుజాలను ఆవరించి వున్నాయి.

ఆ రాజరాజేశ్వరి భుజాలను చేరి అవి సార్ధకత పొందాయి. 

అమ్మవారి నాలుగు భుజాలనీ, ఎంతో కాంతివంతమైన ఆ బంగారపు భుజకీర్తులు సగర్వంగా 

చుట్టుకుని, ఆ మహోన్నతమైన భుజాల వలన అమేయమైన కాంతినీ, శక్తినీ పొందుతున్నాయి. 

చిన్నపిల్లలు తల్లిని కావలించుకుని సంబరపడ్డట్టు, ఆ భుజకీర్తులు, జగన్మాత నాలుగుభుజాలనూ 

చుట్టుకుని, పట్టుకుని ఆనందిస్తూ ఆభరణాలుగా తమ ప్రకాశాన్ని మరింత పెంచుకుంటున్నాయి. 

ఆహా, అమ్మకి భుజకీర్తులవ్వటం వల్ల కదా మాకింత ఘనత కలిగిందీ,  

ఇంత విలువ వచ్చిందీ అని ఉప్పొంగిపోతున్నాయి. 

అటువంటి గొప్పవైన భుజాలను కమనీయంగా చుట్టుకుని వున్న ఆ ఆభరణాలు 

అమ్మని ఎంతో ప్రేమాదరాలతో సేవించుకుంటున్నాయి. 

బంగారపు కేయూరాంగదములనే భుజకీర్తులను ధరించి వాటికి తన ప్రకాశాన్ని మురిపెంగా 

పంచుతున్న, ఆ కనకాంగదకేయూరకమనీయభుజాన్విత కు వందనం. 

ఓం శ్రీ  కనకాంగదకేయూరకమనీయభుజాన్వితాయై నమః 

32. రత్నగ్రైవేయ చింతాకలోలముక్తాఫలాన్వితా

గ్రీవము అంటే కంఠము. ఇక్కడ అమ్మవారి కంఠాభరణాల గురించిన వర్ణన వుంది.

రత్నములతో కూడిన హారములు ఆ శివాని కంఠములో ఎంతో ముచ్చటగా చేరి వున్నాయి. 

ఆ రత్నగ్రీవము మహా సౌందర్యంతో ప్రకాశిస్తోంది. 

ఆ రత్నాలకు జతగా మంచి ముత్యములు చక్కగా మెరుస్తూ కదలాడుతున్నాయి. 

చెట్ల కొమ్మలకి వ్రేలాడే ఫలముల వలే ఆ ముక్తాఫలాలు రత్నహారానికి వ్రేలాడుతున్నాయి. 

అవి చంచలంగా, స్థిరంగా లేకుండా, చింతలతో కల్లోలంగా వున్న మనసు వలె ఊగుతున్నాయి. 

ముత్యము చంద్రునికి చెందిన రత్న విశేషము. 

చంద్రుడు మనః కారకుడు. మనసు చలిస్తూ ఎప్పుడూ చింతలతో కల్లోలంగా ఉంటుంది. 

ఇక్కడ హారములలోని ముత్యాలు ఆ విధంగా చింతలతో కల్లోలంగా వున్న మనసు వలె  

కదులుతూ వూగుతున్నాయిట. ఎంత అందమైన పోలిక. 

అలా అమ్మ మెడలో కదలాడే ఆ ముత్యాలను చూస్తే మన చింతలు దూరమైపోవూ. 

రత్నము ప్రజ్ఞతో ప్రకాశిస్తూ స్థిరంగా బంగారములో పొదగబడి వున్నది. 

అమ్మవారి కంఠంలో తళతళలాడే రత్నహారాలను చూస్తే, మనలోని ప్రజ్ఞ ఇంకా ప్రకాశించదూ. 

అటువంటి రత్నాలహారము అమ్మ మెడను పట్టుకుని మరింత ప్రజ్ఞను పొందింది. 

ఆ రత్నమూ, ఈ ముత్యమూ కలిసి ఆ తల్లి కంఠానికి హారములై  గొప్ప మర్యాదని పొందాయి. 

చింతలకు కల్లోలంగా వున్న మన మనసు వంటి ముక్తాఫలాలతో కూడిన రత్నహారాలతో, 

వెలుగొందుతున్న కంఠము కల ఆ రత్నగ్రైవేయ చింతాకలోలముక్తాఫలాన్విత కు వందనం. 

ఓం శ్రీ రత్నగ్రైవేయ చింతాకలోలముక్తాఫలాన్వితాయై నమః 

------------భట్టిప్రోలు విజయలక్ష్మి
9885010650