మణిపూరాబ్జ నిలయా, వదనత్రయ సంయుతా
వజ్రాదికాయుధోపేతా, డామర్యాదిభి రావృతా ॥ 102 ॥
495. మణిపూరాబ్జ నిలయా
మణిపూరాబ్జనిలయా అంటే, మణిపూర పద్మములో ఉండునది అని అర్ధం.
ఈ రెండు శ్లోకాలలో మణిపూరములో వున్న భగవతి విశేషణముల గురించి చెప్పుకుందాం.
నాభి వద్ద మణిపూర చక్రమున్నది. ఈ మణిపూర చక్రము నకు అధిపతి విష్ణువు.
ఆ చక్రములో వున్న పద్మముపై వున్న దేవి మణిపూరాబ్జనిలయా.
ఈ చక్ర పద్మమునకు పది దళములు. ఆ పద్మము కర్ణిక పై కొలువున్నదే మణిపూరాబ్జనిలయ.
మణిపూర చక్రానిది సువర్లోకం, అగ్ని తత్వము, పసుపురంగు, రూప ప్రధానము.
నాభి వద్ద మణిపూర చక్రములో వున్న, ఆ మణిపూరాబ్జ నిలయ కు వందనం.
ఓం శ్రీ మణిపూరాబ్జనిలయాయై నమః
496. వదనత్రయ సంయుతా
మణిపూరాబ్జనిలయకు మూడు వదనములు, అంటే మూడు ముఖములు.
ఈ మూడు ముఖములు శబ్ద, స్పర్శ, రూప తత్వాలకు ప్రతీక. త్రిగుణములకూ ప్రతీక.
మూడు ముఖములతో శోభిల్లుతున్న, ఆ వదనత్రయ సంయుత కు వందనం.
ఓం శ్రీ వదనత్రయసంయుతాయై నమః
497. వజ్రాదికాయుధోపేతా
వజ్రము మొదలైన ఆయుధములను ధరించిన దేవత అని ఈ నామానికి అర్ధం.
ఈ మణిపూరాబ్జనిలయ తన మూడు చేతులతో ఆయుధాల్ని ధరించి ఉంటుంది.
అవి శక్తి, దండము, దంభోళి. ఈ దంభోళినే వజ్రము అని అంటారు.
నాలుగవచేతితో అభయముద్రను చూపిస్తూ ఉంటుంది. వజ్రము వంటి
ఆయుధములను ధరించిన దేవత కనుక వజ్రాదికాయుధోపేతా అనే నామం వచ్చింది.
వజ్రము వంటి దంభోళిని చేతిలో పట్టుకున్న, ఆ వజ్రాదికాయుధోపేత కు వందనం.
ఓం శ్రీ వజ్రాదికాయుధోపేతాయై నమః
498. డామర్యాదిభిరావృతా
ఈ మణిపూరచక్ర పద్మానికి పది దళములు అని చెప్పుకున్నాం కదా.
ఆ పది దళములలోనూ పది శక్తులు, మధ్యలో నున్న మణిపూరాబ్జనిలయను పరివేష్టించి
ఉంటాయి. ఆ పది దేవతా శక్తులే, మాతృకావర్ణమాలలో డ నుంచి ఫ వరకూ గల హల్లు అక్షరాలు.
ఆ దేవతాశక్తులు వరుసగా, డామరి, ఢంకారిణి, ణామిరి, తామసి, స్థాణ్వి, దాక్షాయణి, ధాత్రి,
నందా, పార్వతి, ఫట్కారిణి. ఈ శక్తులు మణిపూరాబ్జనిలయను చుట్టూ చేరి సేవిస్తూ ఉంటాయి.
డ నుంచి ఫ వరకూ కల హల్లు అక్షరరూప దేవతా శక్తులచే పరివృతమై వున్న,
ఆ డామర్యాదిభిరావృత కు వందనం.
ఓం శ్రీ డామర్యాదిభిరావృతాయై నమః
------------భట్టిప్రోలు విజయలక్ష్మి
9885010650
కామెంట్‌లు లేవు:
కామెంట్‌ను పోస్ట్ చేయండి