109. సహస్రదళ పద్మస్థా, సర్వవర్ణోప శోభితా సర్వాయుధధరా, శుక్ల సంస్థితా, సర్వతోముఖీ

 

సహస్రదళ పద్మస్థా, సర్వవర్ణోప శోభితా 
సర్వాయుధధరా, శుక్ల సంస్థితా, సర్వతోముఖీ ॥ 109 ॥

528. సహస్రదళపద్మస్థా

సహస్రదళపద్మస్ధా అంటే, సహస్రదళపద్మములో ఉండునది అని అర్ధం. 

రాబోయే నామాలలో సహస్రారములో వున్న శ్రీలలిత విశేషణముల గురించి చెప్పుకుందాం. 

ఆజ్ఞకి పైనా, బ్రహ్మరంధ్రముకి కిందా,  గల మధ్యభాగంలో  సహస్రదళపద్మమున్నది. 

ఈ సహస్రదళపద్మమునకు అధిపతులు పరమేశ్వరీ, పరమేశ్వరులు. 

ఈ సహస్రారము శరీరమునకు కొద్దిగా పైన ఉంటుంది. బ్రహ్మ రంధ్రము కానీ 

సహస్రారము కానీ శరీరమునకు పైన వున్న కేంద్రములు. బాహ్యముగా వున్నప్పటికీ,

ఆ రెండూ కూడా జీవి యొక్క ప్రజ్ఞాశరీరము లేదా జ్యోతిశ్చక్రము లోపలే ఉంటాయి.

కొలనులో నీరు ఎంత వున్నా, నీరు కొలది తామెరలు కనుక, కమలాలు ఎప్పుడూ నీటిని 

తాకకుండా కొలను పైభాగాన ఎలా తేలియాడుతూ వుంటాయో, అదేవిధంగా సహస్రార కమలం 

కూడా శరీరానికి తాకకుండా బాహ్యంగా, ఊర్ధ్వంగానే ఉంటుంది. 

 ఆ చక్రములో వున్న పద్మముపై కొలువున్న శ్రీదేవియే సహస్రదళపద్మస్థా. 

ఈ చక్ర పద్మమునకు వెయ్యి దళములు. ఆ పద్మము కర్ణిక పై కొలువున్నదే సహస్రదళపద్మస్థా. 

సహస్రారానిది సత్యలోకం, పరమాత్మ స్థానం, ముదురు ఊదా రంగు, ఆత్మ ప్రధానము. 

సహస్రారము వద్ద పద్మములో అధిష్ఠించిన, ఆ సహస్రదళపద్మస్థ కు వందనం. 

ఓం శ్రీ సహస్రదళపద్మస్థాయై నమః  

529. సర్వవర్ణోపశోభితా

ఇప్పటివరకూ చెప్పుకున్న దేవతల మేని చాయలు, డాకినీ పాటల వర్ణము, రాకినీ చామనచాయ, 

లాకినీ ఎరుపు, కాకినీ పసిమి, సాకినీ ధూమ్రము, హాకినీ తెలుపు. 

అదేవిధంగా ఇప్పటివరకూ చెప్పుకున్న చక్రముల రంగులు, విశుద్ధి నీలము, 

అనాహతము ఆకుపచ్చ, మణిపూరము పసుపు, స్వాధిష్ఠానము సిందూరం, మూలాధారం ఎరుపు, 

ఆజ్ఞ లేత నీలి, లేదా ఊదా, సహస్రారము ముదురు వూదా రంగులు. గమనించి చూస్తే 

ఇవే మనం వరుసగా చెప్పుకునే ఇంద్రధనుస్సు రంగులు. ఇదే మన శరీరంలో వున్న హరివిల్లు. 

ఈ సహస్రార పద్మములో వున్న శ్రీదేవి ఈ పై చెప్పిన రంగులన్నీ కలబోసిన 

సర్వ వర్ణ ఉప శోభితా, అంటే, నానావిధ వర్ణములతో ప్రకాశించు పరమేశ్వరి. 

డాకినీ అ నుండి అః వరకూ, రాకినీ క నుండి ఠ వరకూ, లాకినీ డ నుండి ఫ వరకూ, 

కాకినీ బ నుండి ల వరకూ, సాకినీ వ నుండి స వరకూ, హాకినీ హ, క్ష వరకూ కల వర్ణాక్షర 

దేవతా శక్తులచే సేవింపబడుతున్నాయి. మాతృకా వర్ణమాలలో వున్న ఈ యాభై ఒక్క వర్ణములతో 

అలరారు దేవత సహస్రదళపద్మస్థ. వర్ణము అంటే వన్నె అనీ, అక్షరమనీ అర్ధాలున్నాయి. 

శబ్దములన్నీ ఇక్కడి నుంచే పుడుతున్నాయి. అన్నింటికీ సహస్రారము మాతృస్థానము. 

అనేకానేక వర్ణములతో శోభిల్లు, ఆ సర్వవర్ణోపశోభిత కు వందనం.  

ఓం శ్రీ సర్వవర్ణోపశోభితాయై నమః  

530. సర్వాయుధధరా

ఆయుధములూ అంతే. సర్వ దేవతల ఆయుధములూ ఈ సహస్రదళపద్మస్థవే. 

సహస్రము అంటే వెయ్యి అనే పరిమిత సంఖ్య కాదు. వేనవేలు, కోటానుకోట్లు. 

సహస్ర హస్తములలో, సహస్ర ఆయుధములతో, తేజరిల్లే మహాశక్తి ఈ సహస్రదళపద్మస్థా. 

అనేకానేక ఆయుధములను ధరించి మహా తేజోరూపముతో, ప్రకాశిస్తున్న, 

ఆ సర్వాయుధధర కు వందనం. 

ఓం శ్రీ సర్వాయుధధరాయై నమః  

531. శుక్లసంస్థితా

ప్రతి చక్రములోనూ ఏదో ఒక ధాతువుని ఆవరించి వున్నది లలితాపరమేశ్వరి. 

విశుద్ధిలో చర్మములో, అనాహతములో రక్తములో, మణిపూరములో మాంసములో, 

స్వాధిష్ఠానములో మేదస్సులో, మూలాధారములో ఎముకలలో, ఆజ్ఞలో మజ్జలో, వున్న దేవి 

సహస్రారములో శుక్లరూపములో వున్నది. శుక్లమంటే వీర్యము. 

శుక్లములో వున్నది, వీర్యము నందు అభిమానము కలది అని ఈ నామానికి అర్ధం. 

భవిష్యోత్తర పురాణంలో 'రమణ కాలమందలి ధ్యానములో ఉండునది శుక్లము' అని వున్నది. 

ప్రతిజీవి లోనూ వున్న, శుక్లము లో వుండే, ఆ శుక్లసంస్థిత కు వందనం. 

ఓం శ్రీ శుక్లసంస్థితాయై నమః 

  

532. సర్వతోముఖీ

సర్వతోముఖీ అంటే అన్నివైపులా ముఖములు కలిగి ఏకకాలములో సర్వమూ చూడకలిగిన 

శక్తి కలది అని అర్ధం. అన్ని జీవుల ముఖములూ ఆ పరమేశ్వరివే. 

సహస్ర శీర్షా అనే నామంలో కూడా చెప్పుకున్నాం. ఆ  జగజ్జనని ఎన్నో శిరములతో, 

ముఖములతో, సర్వసాక్షియై, సర్వమూ చూస్తున్న మహాశక్తి. 

అనేకానేక ముఖములు కలిగిన, ఆ సర్వతోముఖి కి వందనం. 

ఓం శ్రీ సర్వతోముఖ్యై  నమః 

------------భట్టిప్రోలు విజయలక్ష్మి

9885010650