104. స్వాధిష్ఠానాంబు జగతా, చతుర్వక్త్ర మనోహరా శూలాద్యాయుధ సంపన్నా, పీతవర్ణా, అతిగర్వితా

  

స్వాధిష్ఠానాంబు జగతా, చతుర్వక్త్ర మనోహరా 
శూలాద్యాయుధ సంపన్నా, పీతవర్ణా, అతిగర్వితా ॥ 104 ॥

504. స్వాధిష్టానాంబుజగతా

స్వాధిష్టానాంబుజగతా అంటే, స్వాధిష్టాన పద్మములో ఉండునది అని అర్ధం. 

ఈ రెండు శ్లోకాలలో స్వాధిష్టానములో వున్న ఆ మాహేశ్వరి విశేషణముల గురించి చెప్పుకుందాం. 

జననేంద్రియము దగ్గర స్వాధిష్టాన చక్రమున్నది. ఈ స్వాధిష్టాన చక్రమునకు అధిపతి బ్రహ్మ. 

ఆ చక్రములో వున్న పద్మముపై వున్న దేవియే స్వాధిష్టానాంబుజగతా. 

ఈ చక్ర పద్మమునకు ఆరు దళములు. ఆ పద్మము కర్ణిక పై కొలువున్నదే స్వాధిష్టానాంబుజగతా. 

స్వాధిష్టాన చక్రానిది భువర్లోకం, జల తత్వము, సిందూరపు రంగు, రస ప్రధానము. 

ఈ దేవి ఎప్పుడూ పరాధీన కాదు, స్వాధిష్ఠాన. స్వతంత్ర. తన స్థలములో తానే వుండు దేవి.  

ఎప్పుడూ పరాధీన కాక, స్వాధీనగా వుండే, ఆ స్వాధిష్టానాంబుజగత కు వందనం. 

ఓం శ్రీ స్వాధిష్టానాంబుజగతాయై నమః  

505. చతుర్వక్త్రమనోహరా 

నాలుగు ముఖములతో మనోహరముగా వుండే దేవత ఈ స్వాధిష్టానాంబుజగతా. 

నాలుగు ముఖములూ శబ్ద, స్పర్శ, రూప, రస తన్మాత్రలకు ప్రతీకలు. 

జలతత్వములో, అగ్నితత్వము, వాయుతత్వమూ, ఆకాశతత్వమూ కూడా ఉంటాయి కదా.  

నాలుగు ముఖములతో మనోజ్ఞముగా వున్న, ఆ చతుర్వక్త్రమనోహర కు వందనం.  

ఓం శ్రీ చతుర్వక్త్రమనోహరాయై నమః  

506. శూలాద్యాయుధసంపన్నా

స్వాధిష్టానాంబుజగత శూలము వంటి ఆయుధ సంపత్తి కలిగి ప్రకాశిస్తూ వున్నది.  

ఆ తల్లి తన మూడు చేతులలో శూలము, పాశము, కపాలము ధరించి వున్నది.  

నాలుగవ చేతితో భక్తులకు అభయ ముద్రను చూపిస్తున్నది. 

శూలము వంటి గొప్ప ఆయుధ సంపత్తిని కలిగివున్న, ఆ శూలాద్యాయుధసంపన్న కు వందనం. 

ఓం శ్రీ శూలాద్యాయుధసంపన్నాయై నమః  

507. పీతవర్ణా

స్వాధిష్టానాంబుజగత శరీరచాయ పీతవర్ణం, బంగారము వంటి మేనిచాయ కలది ఈ దేవత.   

బంగారు పసిమి రంగులో, పచ్చగా ప్రకాశిస్తున్న దేవత ఈ పరమేశ్వరి. 

ఈ పసిమి వర్ణం శుభప్రదం. మంగళకరం. అమ్మవారు స్వాధిష్ఠానమనే పద్మంలో కూర్చుని, 

పచ్చని పసిమి వర్ణంలో శుభప్రదంగా, అభయహస్తంతో దీవిస్తున్నది. 

పసుపు ఆరోగ్యకరం, ఆయుర్వర్ధకం. అమ్మ మేని చాయ పచ్చని పసిమి. 

పచ్చని పసిమి చాయలో మెరిసిపోతున్న, ఆ పీతవర్ణ కు వందనం. 

ఓం శ్రీ పీతవర్ణాయై నమః 

  

508. అతిగర్వితా

స్వాధిష్టానాంబుజగత మహా సౌందర్యవతి, ఆ సౌందర్యాతిశయము వలన కలిగిన 

గర్వముచే, అతిగర్వితయై వున్నది అని ఈ నామం చెప్తోంది. 

సకల సంపదలకూ సృష్టి కర్త, అధినేత్రి, అందుకే అతిగర్వితా. 

అన్నీ పొంది సంతృప్తితో వున్నది కనుక, అతిగర్వితయై వున్నది. 

స్వాభిమానము కల, మహా సౌందర్యవతి యైన, ఆ అతిగర్విత కు వందనం. 

ఓం శ్రీ అతిగర్వితాయై నమః 

------------భట్టిప్రోలు విజయలక్ష్మి

9885010650