57. మహేశ్వర మహాకల్ప మహాతాండవ సాక్షిణీ మహాకామేశ మహిషీ, మహాత్రిపుర సుందరీ

 

మహేశ్వర మహాకల్ప మహాతాండవ సాక్షిణీ 
మహాకామేశ మహిషీ, మహాత్రిపుర సుందరీ ॥ 57 ॥

232. మహేశ్వర మహాకల్ప మహాతాండవ సాక్షిణీ

మహాకల్పాంతమందు మహేశ్వరుడు చేసే మహాతాండవానికి లలితాదేవి సాక్షి, 

అందుకే ఈ నామం వచ్చింది. మహాకల్పం చివరిలో ఆ మహా రుద్రుడు మహాతాండవం 

చేస్తూ ఉంటాడు. ఆ మహాతాండవంలో అన్నీ, అందరూ ఆ అమ్మలో లయమైపోతారు. 

ఆ మహాతాండవంలో జీవులనన్నింటినీ సంహరించి ఉద్ధరించిన మహేశ్వరుడిని  

చూచి ఆ మహాకాళి సంతోషిస్తుంది.  మొత్తం సృష్టి నంతా తనలో లయింపచేసుకుని 

తానొక్కతే ఆ తాండవనాట్యానికి సాక్షిగా ఉంటుంది. 

ఆ మహా కల్పాంత సమయంలో మహా తాండవం చేస్తున్న మహేశ్వరుడుని చూచి ఆనందిస్తున్న, 

ఆ మహేశ్వర మహాకల్ప మహాతాండవ సాక్షిణి కి  వందనం. 

ఓం శ్రీ మహేశ్వరమహాకల్పమహా తాండవసాక్షిణ్యై నమః  

233. మహాకామేశ మహిషీ

కామేశ్వరుడికి పట్టపురాణి కామేశ్వరి, అందువలన ఈ నామం వచ్చింది. 

పరమశివుడు ఈ మహా సృష్టికి మహారాజు. అతని పత్నిగా పార్వతి పట్టపురాణి, పట్టమహిషి. 

కామము అంటే సామాన్యమైన కోరిక. మహా కామము అంటే, ఉత్కృష్టమైన కామము. 

ఈ మహా కామము వలన లోకాలన్నీ ఉద్ధరింపబడతాయి. 

జీవులనందరినీ ఉద్ధరించటమే ఆ కామేశ్వరీ కామేశ్వరుల కోరిక. 

అందుకే ఆ ఆదిదంపతులు మహాకామేశ్వరుడు, మహాకామేశ్వరి అని కీర్తింపబడుతున్నారు. 

ఈ జీవోద్ధరణ అనే మహాకార్యంలో మహాకామేశ్వరుడికి పట్టమహిషిగా తానూ సహకరిస్తున్న, 

ఆ మహాకామేశ మహిషి కి వందనం. 

ఓం శ్రీ మహాకామేశమహిష్యై నమః 

  

234. మహాత్రిపుర సుందరీ

 అమ్మవారు మహా లావణ్య శేవధి. త్రిపురములలో మహా సుందరి. 

మాతృ మాన మేయము లను త్రిపురాలంటాము. ఈ మూడూ ఆ లలితా పరమేశ్వరియే. 

మాతృ అంటే కొలిచేవాడు, మాన అంటే కొలత, మేయము అంటే కొలవబడునది. 

ఈ మూడూ కూడా ఆ శ్రీలలితయే. ఈ మూడింటిలో కూడా ఆ తల్లే గొప్పది. 

ఆ గొప్పదనాన్ని ఇక్కడ సౌందర్యముతో పోల్చారు. సౌందర్యారాధన కూడా ఆరాధనమే. 

శ్రీకృష్ణుణ్ణి, శ్రీరాముణ్ణి, శ్రీలక్ష్మిని, శ్రీలలితని ఆ సౌందర్యాన్ని చూసే కదా అందరూ 

ఆరాధిస్తున్నారు. త్రివురములలోనూ అత్యుత్తమమైన సౌందర్యము కలిగి వున్నది కనుక, 

ఆ లలితాపరమేశ్వరికి ఈ నామం వచ్చింది. అట్టి మహాత్రిపుర సుందరి కి వందనం. 

ఓం శ్రీ మహాత్రిపురసుందర్యై నమః 

------------భట్టిప్రోలు విజయలక్ష్మి

9885010650