61. పంచప్రేతాసనాసీనా, పంచబ్రహ్మ స్వరూపిణీ చిన్మయీ, పరమానందా, విజ్ఞాన ఘనరూపిణీ

 

పంచప్రేతాసనాసీనా, పంచబ్రహ్మ స్వరూపిణీ 
చిన్మయీ, పరమానందా, విజ్ఞాన ఘనరూపిణీ ॥ 61 ॥

249. పంచప్రేతాసనాసీనా 

అయిదు ప్రేతముల చేత ఏర్పడిన ఆసనంపై అధిష్టించిన మాత అని అర్ధం. 

ప్రేతము అంటే శవము, జీవము లేనిది. దీనికి శక్తి తోడైతే, ఆ శవమే శివమవుతుంది. 

బ్రహ్మ, విష్ణువు, రుద్రుడు, ఈశ్వరుడు, సదాశివుడు వీరికి పంచప్రేతములని పేరు. 

అమ్మవారి సింహాసనానికి వీరే నాలుగుకాళ్ళు, ఫలకము. 

ఇంతటి గొప్ప సింహాసనం మీద అధిష్టించి వున్నది కనుకే, ఆ మహారాజ్ఞిని  

శ్రీమత్సింహాసనేశ్వరీ అన్నాం.

ఈ అయిదు ప్రేతములూ కూర్చిన ఆసనం కనుక ఆ ఆసనానికి పంచప్రేతాసనమని పేరు. 

పంచప్రేతముల అధీశ్వరి అయిన, ఆ పంచప్రేతాసనాసీన కు వందనం. 

ఓం శ్రీ పంచప్రేతాసనాసీనాయై నమః  

250. పంచబ్రహ్మ స్వరూపిణీ 

అమ్మవారి పంచబ్రహ్మ స్వరూపాన్ని ఈ నామం చెపుతోంది. 

బ్రహ్మ అంటే సృష్టించగలిగే శక్తి కలవాడు అని అర్ధం. 

బ్రహ్మ, విష్ణువు, రుద్రుడు, ఈశ్వరుడు, సదాశివుడు వీరే పంచబ్రహ్మలు. 

వీరే అమ్మ అనే శక్తి తో కలిస్తే సృష్టి శక్తి చేరి పంచబ్రహ్మలు అవుతున్నారు. 

ఈశానుడు, తత్పురుషుడు, అఘోరుడు, వామదేవుడు, సద్యోజాతుడు శివుడి పంచబ్రహ్మ రూపాలు. 

నారాయణుడు, వాసుదేవుడు, సంకర్షణుడు, ప్రద్యుమ్నుడు, అనిరుద్ధుడు విష్ణువు యొక్క 

పంచబ్రహ్మ రూపాలు. 

పంచభూతాలూ, పంచ తన్మాత్రలు, పంచప్రాణాలు, పంచ ఉపప్రాణాలు, పంచ కర్మేంద్రియాలు, 

పంచ జ్ఞానేంద్రియాలు అనే ఆరు పంచీకరణములతో ఈ ప్రపంచాన్నిసృష్టించిన, 

ఆ పంచబ్రహ్మ స్వరూపిణి కి వందనం. 

ఓం శ్రీ పంచబ్రహ్మస్పరూపిణ్యై నమః 

  

251. చిన్మయీ 

చిన్మయీ అంటే చైతన్య స్వరూపిణి. చిన్మయీ అంటే చిదానందం. 

చిన్మయీ అంటే ఆదిపరాశక్తి. అమ్మను ఈ నామంలో చిన్మయీ అంటున్నాం. 

ఆ పరమేశ్వరి సదా చైతన్య స్వరూపం. శుద్ధ, సత్వ, చైతన్య స్వరూపం. అందుకే అమ్మ చిన్మయి. 

అమ్మ ఎప్పుడూ చిదానందంలో ఉంటుంది. ఆమె చిద్రూప, అందుకే ఆ తల్లి చిన్మయి. 

ఆ రాజరాజేశ్వరి సదా బ్రహ్మానందంలో ఉంటుంది. ఆ తల్లి ఆనందదాయిని. 

ఆ తల్లి చిరునవ్వులో ఎప్పుడూ దివ్యత్వం ఉంటుంది. 

ఎప్పుడూ ఆహ్లాదంగా ఉంటూ భక్తులకు చిదానందాన్ని కలిగిస్తుంది. 

అన్నింటా చైతన్య స్వరూపముతో వ్యక్తమవుతున్న, ఆ చిన్మయి కి వందనం. 

ఓం శ్రీ చిన్మయ్యై నమః 

252. పరమానందా 

ఆనందమే పరబ్రహ్మ అని విష్ణుసహస్రనామస్తోత్రంలో చెప్పారు. 

రకరకాల ఆనందం గురించి చెప్పుకుంటూ ఉంటాం. భౌతికానందము, మానసికానందము,

ఆధ్యాత్మికానందము, సదానందము, చిదానందము,  పరమానందము, బ్రహ్మానందము అని. 

ఈ నామంలో అమ్మను పరమానందా అంటున్నాం. అంటే, పరముతో కూడిన ఆనందం. 

ఈ ఆనందమే అన్ని ఆనందాల్లోకీ పరమోత్కృష్టమైనది. 

ఇది శాశ్వతానందం. ఇది పొందిన జీవుడు ధన్యుడు. 

జీవుడిని పరముతో అనుసంధానము చేసే ఆనందమే పరమానందం. 

ఉపాసకులను పరమానందంతో అనుగ్రహిస్తున్న, ఆ పరమానంద కు వందనం. 

ఓం శ్రీ పరమానందాయై నమః 

253. విజ్ఞాన ఘనరూపిణీ

విజ్ఞానము చిక్కనిదై, సాంద్రమైనప్పుడు, ఆ విజ్ఞానాన్ని ఘనమైన, గొప్పదైన విజ్ఞానము అంటాం. 

విజ్ఞానమంటే చైతన్యము, సంజ్ఞానము అని అర్ధం. శాస్త్ర జ్ఞానమే విజ్ఞానము. 

అన్ని శాస్త్రములకు ఆదిమూలము ఆదిపరాశక్తి, ఆ జ్ఞానేశ్వరి. 

తాను స్వయముగా చైతన్యమయి, ఆ చైతన్యాన్నే అందరికీ ప్రసారం చేస్తున్న శక్తి రూపం అమ్మ. 

అమ్మను మించిన విజ్ఞానము లేదు, ఆ విజ్ఞానము కూడా సంపూర్ణమైనది, చైతన్యవంతమైనది. 

ఆ విజ్ఞానములో కొంచెము కూడా లోపమూ లేదు. లోటూ లేదు. సందు చొరలేనంత పరిపూర్ణ 

విజ్ఞానమది. కనుకనే ఆ తల్లిని విజ్ఞాన ఘన రూపిణీ అని ఈ నామంలో చెప్తున్నాం. 

విజ్ఞానమే పోత పోసిన స్వరూపము అయిన, ఆ విజ్ఞాన ఘనరూపిణి కి వందనం. 

ఓం శ్రీ విజ్ఞానఘనరూపిణ్యై నమః

------------భట్టిప్రోలు విజయలక్ష్మి

9885010650