98. విశుద్ధి చక్రనిలయా, ఆరక్తవర్ణా, త్రిలోచనా ఖట్వాంగాది ప్రహరణా, వదనైక సమన్వితా

 

విశుద్ధి చక్రనిలయా, ఆరక్తవర్ణా, త్రిలోచనా 
ఖట్వాంగాది ప్రహరణా, వదనైక సమన్వితా ॥ 98 ॥

475. విశుద్ధిచక్రనిలయా

విశుద్ధి చక్రనిలయా అంటే కంఠ కూపమందున్న విశుద్ధి చక్ర మధ్యములో ఉండునది అని అర్ధం. 

ఈ రెండు శ్లోకములలో ఆ విశుద్ధి చక్రనిలయ గురించి వివరంగా చెప్పకుందాం. 

కంఠ కూపంలో ఒక చక్రమున్నది. దానినే విశుద్ధి చక్రము అంటాం. 

విశుద్ధిచక్రానిది జనలోకం, ఆకాశతత్వం. నీలి రంగు. శబ్ద ప్రధానం. 

ఆ చక్రమధ్యంలో ఒక పద్మము వున్నది. ఆ పద్మమునకు పదహారు దళములు. 

ఆ పద్మ మధ్యంలో ఉన్న కర్ణిక, తామర బొడ్డుపై, ఆసీనురాలై అమ్మ కూర్చుని వున్నది. 

ఆ పరమేశ్వరీ శక్తియే విశుద్ధిచక్రనిలయ. ఈ చక్రానికి  అధిదేవత జీవుడు. 

కంఠకూపమందున్న పద్మములో ఆసీనురాలై వున్న, ఆ విశుద్ధిచక్రనిలయ కు వందనం. 

ఓం శ్రీ విశుద్ధిచక్రనిలయాయై నమః  

476. ఆరక్తవర్ణా

ఆరక్తవర్ణా అంటే కొద్దిగా తెలుపు కలసిన ఎరుపు రంగు అని అర్ధం. అటువంటి వర్ణాన్ని 

పాటలీ వర్ణము అంటారు. తెలుపు, ఎరుపు కలసిన పాటలీ వర్ణము, అంటే గులాబీ రంగు. 

ఈ నామంలో విశుద్ధి చక్ర నిలయ యొక్క వర్ణము పాటలీ వర్ణమని చెప్తున్నారు.  

పాటలీవర్ణములో ఆ లలితాదేవి పద్మములో ప్రశాంతంగా కూర్చుని మెరిసిపోతున్నది.  

ఈ నామంలో అమ్మవారి దేహచ్ఛాయ గురించి తెలుసుకున్నాం. 

పాటలీవర్ణంలో అందముగా వెలిగిపోతున్న దేహచ్ఛాయలో వున్న, ఆ ఆరక్తవర్ణ కు వందనం.  

ఓం శ్రీ ఆరక్తవర్ణాయై నమః  

477. త్రిలోచనా

ఈ నామంలో ఆ విశుద్ధిచక్రనిలయకు మూడుకన్నులున్నవని చెప్పుకుంటున్నాం. 

అమ్మ త్రయీమయి కదా. ముచ్చటైన మూడుకన్నులతో ఈ సృష్టిని అంతా చూస్తూ, 

అన్ని కార్యాలూ పర్యవేక్షిస్తోంది. ఆ మూడు కన్నులే సూర్యుడు, చంద్రుడు, అగ్ని. 

ఏమి చూడాలన్నా కాంతి కావాలి కదా. అమ్మ మూడు కన్నులూ మూడు కాంతి స్రోతస్సులు. 

కన్నులకు ఆ కాంతి ప్రవాహాన్ని ఇచ్చింది శ్రీలలితాపరమేశ్వరియే. 

అసలైన కాంతి జనకమైన ఆ కాంతిమతి, తన కిరణాలను సూర్య, చంద్ర, అగ్నుల ద్వారా 

ప్రసరిస్తోంది. ఆ మూడు కన్నులూ ఋగ్యజుర్సామ వేదాలకు ప్రతీక.  

ప్రతి జీవికీ కూడా మూడు కన్నులు ఉంటాయి, ఆ కన్నులను వాడటం తెలుసుకోవాలి, అంతే . 

మూడు కన్నులతో ఈ సృష్టి కంతటికీ కాంతిని ప్రసారం చేస్తున్న, ఆ త్రిలోచన కు వందనం. 

ఓం శ్రీ త్రిలోచనాయై నమః  

478. ఖట్వాంగాదిప్రహరణా 

ఖట్వాంగము అంటే మంచం కోడు. శివుని ఆయుధాలలో ఒకటి. 

ఖట్వాంగము వెన్నెముక మీద ఉంచిన కపాలము వలె ఉంటుంది. 

అదే ఆయుధముగా ఆ శ్రీ లలిత ఒక చేతిలో పట్టుకుని వున్నది. 

మిగిలిన మూడు చేతులలో, ఖడ్గము, త్రిశూలము, చర్మము పట్టుకుని ఉంటుంది. 

ప్రతి మానవునిలో ఈ ఖట్వాంగము ఉన్నది. ఆ ఖట్వాంగమును నడిపించేది అమ్మే. 

ఖట్వాంగమును చేతిలో ఆయుధము వలె ధరించిన, ఆ ఖట్వాంగాదిప్రహరణ కి వందనం. 

ఓం శ్రీ ఖట్వాంగాదిప్రహరణాయై నమః 

  

479. వదనైకసమన్వితా

వదనైక సమన్వితా అంటే, ఏక వదనంతో వున్నది అని అర్ధం. 

విశుద్ధిచక్రనిలయ కు ఒకే ముఖము. ఆ అందమైన ముఖంతో, అమితమైన తేజస్సుతో 

వున్న లలితాదేవిని  గురించి ఈ నామంలో చెప్పుకుంటున్నాం. 

ప్రతివారి ముఖంలోనూ తేజో రూపములో వున్నది ఆ వదనైకసమన్విత యైన శ్రీ లలిత. 

అందంగా అమరివున్న ఒక్క ముఖమును కలిగివున్న, ఆ వదనైకసమన్విత కు వందనం. 

ఓం శ్రీ వదనైకసమన్వితాయై నమః 

------------భట్టిప్రోలు విజయలక్ష్మి

9885010650