99. పాయసాన్నప్రియా, త్వక్స్థా, పశులోక భయంకరీ అమృతాది మహాశక్తి సంవృతా, డాకినీశ్వరీ

  

పాయసాన్నప్రియా, త్వక్స్థా, పశులోక భయంకరీ 
అమృతాది మహాశక్తి సంవృతా, డాకినీశ్వరీ ॥ 99 ॥

480. పాయసాన్నప్రియా

ఈ నామంలో విశుద్ధి చక్రనిలయకు ఇష్టమైన పదార్ధం ఏమిటో చెప్పకుందాం. 

పాయసాన్నప్రియా అనే నామం, అమ్మవారికి పాయసాన్నమంటే ఇష్టమని చెప్తున్నది. 

పయః అంటే పాలు. పాలు, బియ్యం, బెల్లం వేసి వండిన పాయసాన్నమంటే కంఠకూపంలో 

వున్న, విశుద్ధి చక్రనిలయకు ఎంతో ఇష్టం. అమ్మను తృప్తి పరచటం భక్తులకు ఇష్టం. 

అందరికీ అంతే కదా, గొంతులో నుంచి మధురమైన పాయసం లోపలకు దిగుతుంటే హాయిగా

అనిపించదూ. మన కంఠకూపంలో వున్న ఆ విశుద్ధి చక్రనిలయకు కూడా పాయసాన్నమే ఇష్టం.  

పాలు, బెల్లం వేసి వండిన తియ్యని పాయసాన్నాన్ని ప్రియంగా స్వీకరిస్తున్న, 

ఆ పాయసాన్నప్రియ కు వందనం. 

ఓం శ్రీ పాయసాన్నప్రియాయై నమః  

481. త్వక్స్థా

విశుద్ధి చక్రనిలయ తన నాలుగు చేతులలో ఒక దానిలో చర్మాన్ని ధరించి వున్నదని

చెప్పుకున్నాం కదా. అదే ఈ నామానికి అర్ధం. త్వగింద్రియం అంటే చర్మము. 

త్వక్ అంటే చర్మములో, స్థా అంటే ఉండునది. త్వక్స్థా అంటే చర్మములో ఉండునది. 

ప్రతి జీవి చర్మములో వుండే ధాతువు ఆ లలితాపరమేశ్వరియే. 

అమ్మ మనల్ని చర్మం రూపంలో మొత్తం కప్పేసి ఉందని ఊహిస్తుంటే, అద్భుతంగా లేదూ. 

చర్మ సంబంధమైన ఏ సమస్య వచ్చినా, చర్మంపై మచ్చలు వచ్చినా, కాలినా, మరి ఏ ఇతర 

సమస్య వచ్చినా, ఈ నామం జపిస్తే, స్వస్థత కలుగుతుంది. 

చర్మ రూపంలో ప్రతి జీవినీ పూర్తిగా ఆవరించి ఉన్న, ఆ త్వక్స్థ కు వందనం.  

ఓం శ్రీ త్వక్స్థాయై  నమః  

482. పశులోకభయంకరీ 

పశుపతి అంటే శివుడు. పశువులన్నింటికీ అధిపతి. 

పశువులంటే దేవుడు వేరు, నేను వేరు అనుకునే అజ్ఞానులు. 

అద్వైతము అర్ధము చేసుకోని అవిద్యాపరులు. అద్వైతం 'అహం బ్రహ్మాస్మి' అని చెప్పింది. 

ఆ భావన అర్ధం చేసుకోని వాడు పశువు. అట్టి పశువులుండే లోకానికి భయంకరి, శ్రీలలిత. 

అందుకే ఈ నామంలో ఆ విశుద్ధి చక్రనిలయను పశులోక భయంకరీ అంటున్నాం.  

అద్వైతమును నమ్మని వారి పాలిట భయంకరిగా వున్న, ఆ పశులోకభయంకరి కి వందనం. 

ఓం శ్రీ పశులోకభయంకర్యై నమః  

483. అమృతాదిమహాశక్తిసంవృతా 

అమృతా మొదలగు పదహారు శక్తులచే సంవృతమైనది అని భావం. 

విశుద్ధిచక్ర పద్మానికి పదహారు దళములు ఉన్నాయని చెప్పుకున్నాం కదా. 

ఈ అమృతాది పదహారు శక్తులూ ఒక్కక్క శక్తి, ఒక్కొక్క దళములో వుంటాయి. 

ఈ శక్తులు పద్మ కర్ణికలో కూర్చుని వున్న, ఆ విశుద్ధి చక్రనిలయను పరివేష్టించి ఉంటాయి. 

ఆ పదహారు శక్తులు, అమృతా, ఆకర్షిణి, ఇంద్రాణి, ఈశాని, ఉషఃకేసి, ఊర్ధ్వ, ఋద్ధిత, 

ౠకార, కార, షా, ఏకపదా, ఐశ్వర్యా, ఓంకార, ఔషధీ, అంబికా, అఃక్షరా.  

ఇవి మాతృకావర్ణమాలలో వున్న అచ్చు అక్షరములను సూచిస్తాయి. 

ఆ, ఆ, ఇ, ఈ, ఉ, ఊ, ఋ, ౠ, ఌ, ౡ, ఏ, ఐ, ఓ, ఔ, అం, అః.    

పరా వాక్కు కంఠానికి చేరి ఇక్కడ అచ్చులతో కలసి వైఖరీరూపంలో బయటకు వస్తుంది. 

పదహారు అచ్చులచే పరివేష్టింపబడిన, ఆ అమృతాదిమహాశక్తిసంవృత కు వందనం. 

ఓం శ్రీ అమృతాదిమహాశక్తిసంవృతాయై నమః 

  

484. డాకినీశ్వరీ 

 విశుద్దిచక్రాధీశ్వరీకి డాకినీ అని పేరు. పైన చెప్పుకున్న లక్షణములన్నీ కలిగిన దేవత డాకినీ.  

విశుద్దిచక్రనిలయా, ఆరక్తవర్ణా, త్రిలోచనా, ఖట్వాంగాదిప్రహరణా, వదనైకసమన్వితా,

పాయసాన్నప్రియా, త్వక్స్థా, పశులోకభయంకరీ, అమృతాదిమహాశక్తిసంవృతా, 

అనే ఈ తొమ్మిది విశేషణములనూ కలిగిన దేవత డాకినీశ్వరీ. 

డాకినీశ్వరీ శక్తి, విశుద్ధి చక్ర పద్మంలో ఉంటూ, పాటలీవర్ణ చాయలో మెరుస్తూ, 

మూడు నేత్రాలతో, ఖట్వాంగాది ఆయుధములను చేత ధరించి, ఏక వదనముతో ప్రకాశిస్తూ, 

చర్మధాతువు నందు ఉంటూ, పశులోకాల పాలిట భయంకరియై, చుట్టూ అమృత మొదలగు 

పదహారు అచ్చు అక్షరముల దేవతా శక్తులతో వుండి, పాయసాన్నముపై ప్రీతి కలది అని 

విశుద్ధి చక్రాధిష్టాన దేవత గురించి చెప్పుకుంటున్నాం.  

తొమ్మిది విశేషణముల విశేష్య స్వరూపురాలు, ఆ డాకినీశ్వరి కి వందనం. 

ఓం శ్రీ డాకినీశ్వర్యై నమః 

------------భట్టిప్రోలు విజయలక్ష్మి

9885010650