100. అనాహతాబ్జ నిలయా, శ్యామాభా, వదనద్వయా దంష్ట్రోజ్జ్వలా, అక్షమాలాధిధరా, రుధిర సంస్థితా

  

అనాహతాబ్జ నిలయా, శ్యామాభా, వదనద్వయా 
దంష్ట్రోజ్వలా, అక్షమాలాదిధరా, రుధిర సంస్థితా ॥ 100 ॥

485. అనాహతాబ్జ నిలయా

అనాహతాబ్జ నిలయా అంటే అనాహత చక్రములో వున్న అబ్జము, కమలంలో కూర్చున్న 

లలితా పరమేశ్వరీ దేవి అని అర్ధం. అనాహత చక్రానికి పన్నెండు దళములు. 

ఆ పన్నెండు దళముల పద్మము మధ్యనున్న కర్ణికలో ఆసీనురాలైన తల్లి అనాహతాబ్జ నిలయా. 

అనాహత చక్రానిది మహర్లోకం, వాయు తత్వం, ఆకుపచ్చ రంగు, స్పర్శ ప్రధానం. 

అనాహత చక్రానిది హృదయస్థానం. హృదయంలో కొలువై వున్న అమ్మ అనాహతాబ్జ నిలయా. 

రానున్న రెండు శ్లోకాలలో ఈ అనాహతాబ్జ నిలయ విశేషణముల గురించి చెప్పుకుందాం. 

హృదయస్థానములో పద్మములో కొలువై వున్న, ఆ అనాహతాబ్జ నిలయ కు వందనం. 

ఓం శ్రీ అనాహతాబ్జ నిలయాయై నమః  

486. శ్యామాభా

శ్యామాభా అంటే శ్యామల వర్ణము కలది అని అర్ధం. శ్యామల వర్ణపు కాంతితో వున్నది అమ్మ. 

ఈ శ్యామల వర్ణాన్నే వాడుక భాషలో చామన చాయ అంటాం. 

శ్యామా అంటే చామనచాయలో, ఆభా అంటే ప్రకాశిస్తున్న దేవత శ్యామాభా. 

పదహారు సంవత్సరముల బాలికను శ్యామల అంటాం. 

ఇదే శ్యామల వర్ణంలో వుండే శ్రీకృష్ణుడిని కూడా శ్యామ్ అంటాం. 

ఈ నామంలో అనాహతాబ్జ నిలయ యొక్క శరీరపు చాయ, చామనచాయ అని చెప్పుకుంటున్నాం. 

చామనచాయ లో మెరుస్తున్న, ఆ శ్యామాభ కు వందనం.  

ఓం శ్రీ శ్యామాభాయై నమః  

487. వదనద్వయా 

ఈ అనాహతాబ్జ నిలయకు రెండు వదనములు. అనగా రెండు తలలు. 

వాయుతత్వము అని చెప్పుకున్నాం కదా. ఆ వాయుతత్వము లోనే ఆకాశ తత్వము 

కూడా ఇమిడి ఉంటుంది. అందుకే  ఈ దేవికి రెండు తలలు. 

శబ్దము, స్పర్శ రెండు తన్మాత్రలూ ఉత్తేజితమయి ఉంటాయి. 

రెండు తత్వములతో, రెండు తలలతో ప్రకాశిస్తున్న, ఆ వదనద్వయ కు వందనం. 

ఓం శ్రీ వదనద్వయాయై నమః  

488. దంష్ట్రోజ్వలా

ఉజ్వలమైన కోరలతో, అనగా దంతములతో ప్రకాశించే దేవత దంష్ట్రోజ్వలా. 

శరీరము చాయ చామనచాయ. దంతములు మాత్రం చక్కని తెలుపుతో మెరిసే కోరలు. 

ఈ కోరలు వరాహము కోరల వంటివి. ఆ కోరలతోనే భూమిని ఉద్ధరించింది వరాహము. 

వరాహ సమాన తెల్లని కోరలతో ఉజ్వలంగా వున్న, ఆ దంష్ట్రోజ్వల కు వందనం. 

ఓం శ్రీ దంష్ట్రోజ్వలాయై నమః 

489. అక్షమాలాదిధరా

అక్షమాల గురించి ముందే చెప్పుకున్నాం. అ నుంచి క్ష వరకు కల అక్షరముల మాల అక్షమాల. 

ఈ అనాహతాబ్జ నిలయ చేతిలో అక్షమాలను ధరించి ఉంటుంది. అక్షమాల లో కొలికి పూస క్ష.  

బండి ఇరుసుకు కూడా అక్షం అని పేరు. కనుక అక్షమాల అంటే చక్రము అని కూడా అర్ధం.  

చేతిలో చక్రము ధరించి వున్న దేవత అనాహతాబ్జ నిలయ. 

మిగిలిన చేతులలో శూలము, కపాలం, డమరుకం ధరించి ఉంటుంది. 

చేతిలో అక్షమాలను ధరించి వున్న, ఆ అక్షమాలాదిధర కు వందనం. 

ఓం శ్రీ అక్షమాలాదిధరాయై నమః 

490. రుధిర సంస్థితా

రక్తము నందున్న దేవత అని అర్ధం. రక్తమంటే ప్రీతి. 

విశుద్ధిచక్ర నిలయ చర్మములో ఉంటే, అనాహతాబ్జనిలయ రక్తములో ఉంటుంది. 

రక్తములో ఉంటూ జీవుల శరీరమంతా ప్రవహిస్తున్నది ఈ రుధిర సంస్థిత. 

రక్త దోషములుంటే, లేదా రక్తము తక్కువగావుంటే ఈ నామ జపం చేస్తే స్వస్థత కలుగుతుంది. 

రక్తములో ఉంటూ, రక్తదోషాలను నివారించే, ఆ రుధిర సంస్థిత కు వందనం. 

ఓం శ్రీ రుధిర సంస్థితాయై నమః   

------------భట్టిప్రోలు విజయలక్ష్మి

9885010650